Natatangi ang koleksyon ng mga kritikal na sanaysay na ito ni U Z. Eliserio. Lagi’t lagi niyang nagagawan ng paraan ang pagsasanib ng kanluraning mga teorya tungo sa praktikal na pagsuri ng sitwasyong kultural, politikal at panlipunan ng Pilipinas. Makabuluhang materyal ang kanyang mga inilalatag na pilosopikal na pag-unawa sa masalimuot na kondisyon ng tao gamit ang panitikan bilang lente. Nasasaling niya ang ating sensibilidad kaya matutuklasan natin na sa huli, ang sarili pala natin ang ating binabasa.

Dr. Rommel B. Rodriguez
Direktor
UP Diliman Sentro ng WIkang Filipino

Malakas sa koleksyon ng mga kritika ni Eliserio ang paggamit ng Filipino para magtampok ng mga manunulat at iskolar na napapabilang sa kanyang pagkahinog bilang manunulat-kritiko—mga guro’t iba pang impluwensya, mga kaedad at kasabayan sa disiplina ng panitikan at malikhaing pagsulat, mga kamag-aral at mag-aaral. Tinatalakay at hinihimay ng kanyang mga piyesa ang iba-ibang teknolohiya, teksto, personalidad, teorya at mga kaalamang umusbong, umiiral o/at nailalapat sa kasalukuyang danas ng sariling bansa. Litaw na litaw ang malay na pagtatangkang ilugar ang sariling mga pagsusuri sa kasaysayan at pagpapatuloy ng mga aralin sa kultura, panitikan at lipunang Pilipino. Sinusuri ni Eliserio ang iba-ibang kaso ng mga kritikal na engkuwentro sa loob ng lipunang Pilipino kasabay ng pagpapakita ng isang bukas na sensibilidad sa pagkikritika. Hindi mapanglahat kundi mapang-aya, imbitasyon ang mga kritikal na sanaysay upang mag-ugat at kumilala, maghambing at magtimbang.

Hindi lamang si Eliserio ang makikilala sa koleksyong ito, kundi ang iba-ibang mga tanaw at pagsipat na nakikipagtalaban sa kanyang buhay bilang iskolar at alagad ng sining.

Vlad Gonzales
Awtor ng Isang Napakalaking
Kaastigan at A-Side/B-Side